Kassakerfið Xpress fyrir Uniconta er nýr framendi á Uniconta bókhaldskerfið og er þróað af Svar í samvinnu við Uniconta á Íslandi.
Xpress býr því yfir öllum eiginleikum sem Uniconta hefur og erfir allar uppfærslur án sérstakrar samþáttunar segja þeir Ívar Kristinn Hallsson og Grétar Örn Hjartarson hugbúnaðarsérfræðingar hjá Svar.
„Xpress er mjög sveigjanlegt og hentar því vel fyrir fjölbreyttan rekstur. Viðskiptavinir okkar eru ýmist með einn eða fleiri kassa í hverri verslun en Xpress eru engin takmörk sett hvað varðar fjölda kassa,“ segir Ívar.
Vegna þess að Xpress er eiginlegur framendi á Uniconta og virkar eingöngu með bókhaldskerfinu Uniconta, þá er uppsetningin einföld og þægileg bætir Grétar við. „Því þarf ekkert sérstakt uppgjör í lok dags heldur er einungis tekin staða á peningum sem eiga að vera í kassanum. Kerfið vinnur á Windows stýrikerfinu og nýtir sér hefðbundinn búnað, svo sem snertiskjái, kvittanaprentara og peningaskúffu. Svar hefur veitt alhliða þjónustu til viðskiptavina og útvegað þeim bæði hugbúnaðinn Xpress og vélbúnað, t.d. tölvur, kvittanaprentara, lyklaborð, mús og peningaskúffu, fyrir þá viðskiptavini sem þess óska.“
Þeir segja Xpress vera einstaklega notendavænt. „Við hönnuðum söluferlið þannig að frá því að vara er stimpluð inn og þar til hún er seld út eru bara 2-3 klikk. Það er því auðvelt að læra á kerfið og byrja að selja. Að auki er einfalt fyrir notandann að breyta flýtivalinu og sérsníða kerfið að sínum þörfum.“
Eins og fyrr segir eru einu kröfurnar þær að vélbúnaðurinn sé með Windows 10/11 uppsettan á vélinni. „Það er stefnan að þróa Xpress þannig að það verði óháð stýrikerfi. Markmiðið er að Xpress muni virka á nánast hvaða vélbúnaði sem er í nánustu framtíð.“