Samþáttanir mismunandi forrita hafa lengi verið til staðar en hafa oft verið kostnaðarsamar og flóknar í framkvæmd. Hér áður fyrr var hver og ein samþáttun sérskrifuð og þurfti stöðugt að viðhalda henni, með tilheyrandi kostnaði. Einnig voru slíkar samþáttanir oft takmarkaðar í eiginleikum og getu og því var oft ekki hagkvæmt að samþátta saman mismunandi forrit nema fyrir allra stærstu fyrirtækin. Þá var það á höndum sérstakra tæknimanna fyrirtækjanna að hugsa um tengingarnar sem iðulega brotnuðu þegar eitt eða fleiri forrit uppfærðu sig.

Í dag er sagan önnur. iPaaS eða plöggarinn er miðlæg eining sem staðlar upplýsingar milli forrita. Plöggarinn heldur utan um alla reglur og ferla sem gögnin fylgja og gefur möguleika á að eiga við gögnin á leið sinni milli forrita eins og t.d. bæta við, sía úr eða umbreyta. Með tilkomu ljósleiðaravæðingarinnar gerast allar slíkar aðgerðir í skýinu á leifturhraða og hægt er að vinna með gögn í rauntíma í mörgum kerfum samtímis. Allt þetta fyrir aðeins brot af þeim kostnaði sem áður var.