Svar og Uniconta eru í viðskiptum við stóra flóru fyrirtækja og til að geta veit þeim sem besta þjónustu er gott að eiga góða að, eins og Eldey hugbúnað sem býður lausnir sem gera Svari og Uniconta aftur kleift að bjóða og hanna ýmsar sérlausnir. Eldey hugbúnaður er meðal annars með bráðsnjallt forrit sem lætur ólík viðskiptakerfi „tala saman“ og gerir þar með allan gagnaflutning á milli kerfa einfaldan og auðveldar til dæmis fyrirtækjum að skipta yfir í Uniconta-bókhaldskerfið.
SÖLUMENN SPÍGSPORA LÉTTIR Í LUND MEÐ HUGBÚNAÐ FRÁ ELDEY
Hátt í hundrað þekkt fyrirtæki eru í áskrift og nota lausnir frá Eldey. Nefna má fyrirtæki eins og Coca Cola, 1912, Mylluna, Ó. Johnson og Kaaber, Nóa-Síríus og Mekka Wines&Spirits. Þeir eru ófáir sölumenn birgja og heildsala sem spígspora um léttir í lund, eldhressir, með Eldeyjar-hugbúnað í spjaldtölvunni eða snjallsímanum. Vörulistar, gátlistar, verð, myndir af vörunum; þetta er allt þarna og blasir við á litríkum skjáum brosmildra sölumanna. Þeir eru í skýjunum – enda með Eldeyjarský.
Það eru niðjar Eldeyjar-Hjalta sem stofnuðu og eiga Eldey hugbúnað; feðgar, þrír bræður, þeir Jón, Davíð og Karl, og faðir þeirra, Helgi Guðmundsson, sem rak hugbúnaðarfyrirtækið Miðverk um árabil. Þeir hugsa í lausnum eins og ættfaðirinn, Eldeyjar-Hjalti, sem fékk viðurnefnið fyrir að klífa Eldey, 77 metra háan klettadrang úti af Reykjanesi, árið 1894 fyrstur manna; ásamt bræðrunum Stefáni og Ágústi Gíslasonum úr Eyjum. Til að klífa klettinn þurftu þeir þremenningar og eldhugar svo sannarlega að hugsa í lausnum. Þeir horfðu upp – þótt skýjalausnir væru þá ekki komnar til sögunnar.
ENGIN VANDAMÁL, BARA LAUSNIR
Engin vandamál, bara lausnir. Þannig er það hjá Eldey hugbúnaði og þannig á það líka að vera. Eldey býður alls kyns hugbúnaðarpakka sem auðveldar fyrirtækjum að klífa kletta og auka tekjur sínar. „Við líkjum þessum pökkum okkar stundum við legókubba – eða púsl – sem hægt er að tengja og láta vinna saman,“ segir Jón Helgason, einn þeirra bræðra í Eldey.
„Þetta byrjaði nú allt saman fyrir um tíu árum þegar einn viðskiptavina okkar spurði mig hvort við gætum hannað sölukerfi fyrir spjaldtölvur og farsíma,“ segir Jón. „Þetta var áskorun. Við fundum lausnina og úr varð hugbúnaðurinn Eldey-farsími (Eldey mobile). Hann tengir viðskiptakerfin í fyrirtækjunum saman við spjaldtölvur og snjallsíma. Þetta er einfalt og þægilegt pöntunar- og sölukerfi sem léttir til dæmis sölumönnum heildverslana og viðskiptavinum þeirra lífið. Það er auðvelt og fljótlegt að panta og selja; skanna og telja vörur. Aukinn hraði og tímasparnaður hjá sölumönnum – og þar með aukin verðmætasköpun,“ segir Jón.
ELDEY LÆTUR STÓR VIÐSKIPTAKERFI „TALA SAMAN“
Eftir Eldey mobile komu fleiri snjallir kubbar; fleiri lausnir, eins og Eldey-ský og Eldey-skýjatenging (Eldey cloud og Eldey sky connector). „Við rekum okkar eigið skýjakerfi, Eldey cloud, og keyrum allan búnað í Werne Global-gagnaverinu. Með þennan pakka sér skýið okkar um að öll tæki hjá notendum séu ávallt með réttar upplýsingar. Eldey sky connector er lítið forrit, app, sem er sett upp hjá viðskiptavinum og getur átt í samskiptum við öll helstu viðskiptakerfin sem notuð eru hérlendis. Þetta þýðir að Eldey lætur ólík viðskiptakerfi „tala saman“ og auðveldar allan gagnaflutning á milli þeirra.“
ELDEY B2B-VEFVERSLUN – OG LÉTTIR LÍKA UNDIR SJÁLFSAFGREIÐSLU
Að sögn Jóns hannaði Eldey B2B-vefverslun forrit fyrir öll fyrirtæki, sem léttir undir sjálfsafgreiðslu og vefverslun hjá heildsölum, birgjum og framleiðendum. „Þannig getur viðskiptavinur tínt allt til sjálfur í vöruhúsi, sett á vagn og skráð jafnóðum inn í Eldey B2B. Þegar kemur að greiðslu liggur pöntunin fyrir á skjánum, salan er bókuð, og afgreiðslumaður kvittar undir.“
SAMSTARF JÓNS OG RÚNARS
Leiðir þeirra Jóns og Rúnars Sigurðssonar, eiganda Svars sem selur m.a. Uniconta-bókhaldskerfið, lágu fyrst saman fyrir mörgum árum. „Ég vann hjá Rúnari í Tæknivali á sínum tíma, þegar ég var um tvítugt og kjúklingur,“ segir Jón. „Ég kynntist honum þá ekki að neinu ráði en sá þó fljótt að hann var ræðinn og skemmtilegur. Leiðir okkar lágu aftur saman fyrir um tuttugu árum þegar ég vann að tölvumálum fyrir Íslensk-ameríska sem setti upp símkerfi frá Svari og síðar Swyx-símkerfið sem er enn í notkun og hefur gefist vel. Og núna erum við jú í samstarfi þar sem bæði Svar og Uniconta eru samstarfsaðilar Eldeyjar hugbúnaðar,“ segir Jón og bætir við hlæjandi: „Ég lít upp til hans, bæði í eiginlegri merkingu og vegna hæfileika hans.“